HATAW! D'yaryo ng Bayan hatawtabloid.com
ARESTADO sa magkakahiwalay na police operations ang 33 katao kabilang ang limang kabataan na sumalungat sa batas, hanggang kahapon ng umaga, 17 Setyembre.
Ayon kay P/Col. Lawrence Cajipe, direktor ng Bulacan Police Provincial Office (BPPO), unang nasakote ang 12 drug suspects sa serye ng mga buy bust operation na ikinasa ng Station Drug Enforcement Units (SDEU) ng Bocaue, Marilao, Obando, Pandi, San Miguel, San Jose del Monte City PNP at Provincial Intelligence Unit (PIU) Bulacan PPO.
Nasamsam sa mga suspek na nasa kustodiya ng kani-kanilang arresting unit/police station, ang 45 sachet ng hinihinalang shabu at buy bust money.
Sumunod dito, nasakote ang tatlong suspek sa anti-illegal gambling operation na inilatag ng mga tauhan ng Baliwag Municipal Police Station (MPS).
Naaktohan ang mga suspek na nagsusugal ng “tong-its” sa Barangay Sta. Barbara, sa bayan ng Baliwag, na nag-udyok sa pulisya na kompiskahin ang isang deck ng baraha, mesa, at bet money na halagang P303.
Samantala, natimbog ang 18 suspek kabilang ang limang kabataang lumabag sa batas o children in conflict with the law (CICL), ng Bulacan police at mga barangay tanod na tumugon sa iba’t ibang krimen sa mga bayan ng Bocaue, Calumpit, Norzagaray, Marilao, at lungsod ng San Jose Del Monte.
Nahaharap ngayon ang mga suspek sa iba’t ibang kasong inihahanda nang ihain sa korte. (MICKA BAUTISTA)
