HATAW! D'yaryo ng Bayan hatawtabloid.com
Kinalap ni Tracy Cabrera
NAG-DEBUT sa TikTok app si Hollywood actress Cameron Diaz sa kakaibang wine drinking challenge.
Minarkahan ni Diaz ang kanyang online debut sa pamamagitan ng isang video na makikita ang aktres ng pelikulang Shrek na umiinom mula sa isang baso ng kanyang organic wine brand na Avaline, na kanyang inilunsad nitong unang bahagi ng taong kasalukuyan kasama ang kanyang partner na si Katherine Power, na makikita din sa video clip.
Sa nasabing video, nakaupong patalikod si Katherine kay Cameron, hawak ang wine glass sa kanyang bibig, sa pagsandal niya sa kanyang kaibigang aktres, aabutin naman ni Cameron ang baso para uminom dito ng alak na nilalaman ng baso.
“Made my first TikTok ya’ll (sic),” caption ni Cameron sa kanyang post para imbitahan ang kanyang mga fans na makibahagi sa popular na #WineChallenge: “Who’s up next?!?!”
Nangahas ang Hollywood star na pasukin ang daigdig ng TikTok ilang buwan lang makaraang isilang ang kanyang supling na si Raddix sa kanyang mister na si Benji Madden nitong nakaraang Disyembre.
Kamakailan ay nagpasalamat si Cameron sa mga tinamasang biyaya sa kanyang pamilya sa gitna ng patuloy na pandemia ng coronavirus.
“Before, my baby was an excuse to stay home. Now I don’t have to make that excuse,” kanyang pagbibiro nang mag-guest sa Late Night with Seth Meyers.
“The best part of having to stay within our little bubble with this COVID situation is that her dad, my husband Benji, he gets to be home,” aniya.
“We’re just having a lot of gratitude for that and yeah, it’s pretty wild,” dagdag ng aktres.
