HATAW! D'yaryo ng Bayan hatawtabloid.com
“KAILANGANG malaman natin ang katotohanan at kailangan marinig ito ng taong bayan.”
Ito ang sinabi ni Sen. Grace Poe sa pagdinig ng committee on public services tungkol sa prankisa ng iba’t ibang broadcast network, kasama ang ABS CBN.
“Binibigyang diin natin, ang pagdinig na ito ay parte ng kapangyarihan ng Senado batay sa nakasaad sa ating Konstitusyon na hindi taliwas sa mga naging desisyon ng Korte Suprema patungkol sa hurisdiksiyon sa pagdinig ng mga prankisa at sabayang pagtalakay ng mga isyu,” ani Poe.
“Bagama’t mas madalas nagmumula ang franchise bills sa Kongreso or sa House, hindi na rin bago na magkaroon ng sabayang pagdinig para sa mabilisang lehislasyon lalo ang mga prayoridad ng presidente tulad ng budget at TRAIN law,” pagdidiin ni Poe.
Tiwala si Poe sa kapangyarihan ng Senado na dinggin ang mga resolusyong inihain ukol sa ABS-CBN.
”Maraming gustong pumigil sa pagdinig na ito o kinukuwestiyon ang pagdinig na ito, pero naninindigan ang Senado sa kapangyarihan nito bilang kapantay na sangay ng gobyerno sa isang republika at demokrasya.
Kailangan nating panatilihin ang balance at separation of powers,” pahayag ni Poe.
Inisa-isa ni Poe ang napakaraming prankisa na nabigyan ng provisional authority ng NTC noon pagkatapos mapaso.
Giit ni Justice Secretary Menardo Guevarra, paiiralin ng NTC ang “equity” tulad ng ginawa sa mga nakaraang prankisa.
Giit ni Poe, walang probisyon sa batas patungkol sa pagbibigay ng provisional authority ng NTC para sa mga nasa proseso ng renewal ng prankisa kung kaya’t dapat pairalin umano ang “equity” na ikabubuti ng nakararami.
ni CYNTHIA MARTIN
ABS-CBN FRANCHISE
PAG-UUSAPAN NA
SA KAMARA
TATALAKAYIN na sa Committee on Legislative Franchise ang prankisa ng ABS-CBN.
Ayon kay Chairman Franz Alvarez ng komite, kailangan nang magsumite ang mga stakeholders ng kanilang mga posisyon patungkol sa prankisa.
“Pagkatapos po ng konsultasyon ko kay Speaker Cayetano at iba pang miyembro ng liderato, napagkasunduan po naming umpisahan na ngayong araw ang proceedings,” ani Alvarez sa panayam.
“Witnesses and resource persons will be summoned after all position papers have been carefully studied and all issues have been threshed out at the Committee level,” paliwanag niya.
Nangako si Alvarez na pag-aaralan ng kanyang komite ang lahat ng posisyon.
“We assure the public that the Committee will take into consideration all the position papers officially submitted to the Committee and study them even during session break,” ayon sa vice chair ng komite na si Antonio “Tonypet” Albano.
Matagal nang ‘inupuan’ ng komite ni Alvarez ang prankisa ng dambuhalang telebisyon.
Sa press release ng opisina ni Speaker Cayetano, sinabi nito na makikipag-usap sila sa National Telecommunications Commission (NTC) at sa Department of Justice (DOJ) kung ano ang legal opinion ng ahensiya sa isyu kung papayagang magpatuloy ng operasyon ang ABS CBN kapag napaso ang lisensiya nito.
“May mga precedent na rin kasi ang ganitong sitwasyon na hinayaan ng NTC na magpatuloy ‘yung operations ng network – tulad na lang ng GMA, Radyo Veritas, at PT&T – habang nasa hearing ‘yung expired franchise nila,” ani Alvarez.
Kaugnay nito, tatlong prankisa ang inaprobahan ng komite kahapon. Ito ang Bayan Telecommunications Inc., Tandag Electric and Telephone Company, Inc., at ang Caceres Broadcasting Corporation.
(GERRY BALDO)
TOLENTINO NAGBABALA
SA POSIBLENG MALABAG
NG SENADO SA PAGDINIG
NG ABS-CBN FRANCHISE
NAGBABALA si Senador Francis Tolentino na posibleng may malabag na batas ang senado sa isinagawang pagdinig sa prankisa ng ABS CBN na nakatakdang mapaso sa 30 Marso 2020.
Sa naturang pagdinig, sinabi ni Tolentino, nangangamba siya sa posibleng paglabag sa subjudice rule kung hindi maaaring talakayin ng senado ang merito ng isang nakabinbing kaso.
Ayon kay Tolentino, nakasalang ang quo warranto petition ni Solicitor General Jose Calida sa Korte Suprema kaugnay sa prankisa ng ABS CBN.
Sinabi ni Tolentino, imbes public hearing mas makabubuti na magsagawa muna ng close door meeting ang senado hinggil dito.
Ngunit agad dumepensa si Senador Sonny Angara na maaari aniyang pag-aralan ng senado ang isyung kinahaharap ng ABS CBN kahit may nakabinbin na kaso sa Supreme Court.
Inihalimbawa ni Angara ang budget at tax bills na kahit wala pa sa kamay ng senado mula sa kamara ay binubusisi na nila na maaari rin aniyang gawin sa isyu ng prankisa.
Sa panig ni dating justice secretary na ngayon ay si Senate Minority Leader Franklin Drilon, sinabi niyang nagdesisyon ang Supreme Court, 25 taon na ang nakalilipas na nagsasabing hindi nakasaad sa Konstitusyon na hindi maaaring talakayin ng senado ang isang panukalang batas kung nasa kamay ng Mababang Kapulunagan ng kongreso.
Kaugnay nito, naglunsad ng kilos protesta ang ilang grupo na sumusuporta sa prankisa ng estasyon.
(NIÑO ACLAN)
Hirit ng Palasyo
BONG GO NAGLABAS
NG SAMA NG LOOB
KONTRA ABS-CBN
TAHASANG sinabi ni Senador Christopher Lawrence “Bong” Go na ‘bias’ ang kompanyang ABS CBN kung kaya’t hindi masisi kung bakit ganoon ang nararamdamang galit o sama ng loob ni Pangulong Rodrigo “Digong” Duterte.
Ang pahayag ay ginawa ni Go sa pagdinig ng Senate committee on public services na pinamumunuan ni Senadora Grace Poe na dumidinig sa prankisa ng naturang estasyon.
Tinukoy ni Go, nagsimula ang sama ng loob ng Pangulo noong hindi naisahimpapwid ng estasyon ang political ads noong huling presidential campaign hanggang sumapit ang eleksiyon.
Iginiit ni Go, kung hindi ito naisahimpapwid dapat ay naging naging parehas sila sa pagtrato sa iba pang mga kandidato o nagpapa-ads.
Ibinunyag ni Go, hindi na nga isinahimpapawid ang political ads ng Pangulo ay naglabas pa ng ibang ads na naninira o negatibong bagay laban sa noo’y kandidato sa pagkapangulo na si Duterte.
Kaugnay nito, inamin ni Senate Majority Leader Juan Miguel Zubiri, maging siya ay naging biktima ng ABS CBN dahil hindi rin naisahimpapawid ang kanyang political ads kahit bayad na kung kaya’t sa huli ay ibinalik sa kanya ang kanilang ibinayad.
Samantala, hindi nakadalo si Solicitor General Jose Calida sa pagdinig ng senado na naunang naghain ng petisyon sa Korte Suprema ukol sa Quo Warranto Petition laban sa naturang estasyon.
(CYNTHIA MARTIN)
PALASYO ‘NAGLUWAG’
SA PAUMANHIN
NG ABS-CBN
NAGALAK ang Malacañang sa paghingi ng paumanhin ng ABS-CBN sa hindi pag-ere ng political ads ni Pangulong Rodrigo Duterte noong 2016 presidential elections.
Ayon kay Presidential Spokesman Salvador Panelo, noon pa dapat ginawa ito ng ABS-CBN.
“I’m glad, finally, ABS-CBN has admitted its shortcomings to the President. Dapat noon pa nila ‘yun ginawa,” ani Panelo sa press briefing sa Palasyo kahapon.
Hindi masagot ni Panelo kung tatanggapin ng Pangulo ang apology ng ABS-CBN.
“Nasa kay Presidente ‘yun. Matagal na nangyari ‘yun. Kumbaga, kung (hindi) nag-alboroto saka lang hihingi ng paumanhin. It’s a personal decision,”dagdag niya.
(ROSE NOVENARIO)
