9th OFW & Family Summit sa 12 Nob inianunsiyo ni Villar

INIHAYAG  ni Senadora Cynthia Villar  ang pagdaraos ng 9th OFW and Family Summit sa darating na Martes, 12 Nobyembre, na gaganapin sa World Trade Center sa Pasay City.

Sa isang panayam kay Villar muli nilang inaasahan ang libo-libong overseas Filipino workers (OFWs) at kanilang beneficiaries ang daragsa sa Hall D ng World Trade Center tulad sa nakalipas na mga taon.

“My family and many OFWs always look forward to this event because it has evolved into an occasion where OFWs and their families gather and interact with private and government institutions for concerns ranging from access to financial services, social benefits, legal assistance, among others,” ani  Villar.

Ang naturang summit ay mayroong temang “Kabuhayan sa Sariling Bayan” na naglalayong magkaroon ng sariling kabuhayan at pagkakakitaan sa ating bansa ang OFWs o pamilya nila upang sa ganoon ay hindi na mangingibansang bansa pang muli.

Kabilang sa tatalakayin ang financial literacy para sa OFWs upang sa ganoon ay makatulong ito upang mapalago ang perang kinita ng OFWs mula sa ibang bansa.

Sinamahan ni Susan “Toots” Ople ng  Ople Training Center si  Villar, director ng Villar Social Institute for Poverty Alleviation and Governance (Villar SIPAG), sa idinaos na press conference.

“Aside from teaching our OFWs how to wisely invest their savings and grow their income, it is equally important to educate them how to protect their hard-earned money and how not to fall victims of human trafficking, illegal recruitment and investment scams,” dagdag ni Villar.

Inaasahang dadalo sa Summit sina dating Senate President Manny Villar, Las Piñas Rep. Camille Villar, DPWH Sec. Mark Villar, Pasay City Mayor Imelda Calixto-Rubiano at Department of Trade and Industry Sec. Ramon Lopez.

Magsasalita tungkol sa pagpapalago ng kita sina Burn Gutierrez, CEO ng English Learning Camp at may akda ng ”The Adventures of Pepot Kuripot and Dora Gastadora,” ang kauna-unahang  finance-influenced comic book sa Filipinas; Eric Atanacio, may-ari ng Terra Verde Ecofarm; Rienzie Biolena, pangulo at chief financial planner ng Wealth Arki Consultancy, Inc.

Sa paksang Business Landscape and Trends for Start-ups, ang mga panelist ay sina Emma Tolentino, may-ari ng Eco Natural Integrated Farm; Ace Vergel dela Cruz, acquisition executive ng Grab Ph; at Capt. Danny Ricohermoso, executive vice president ng Integrated Seafarers of the Philippines, Inc.

May segment din ang mga OFW na naging matagumpay na entrepreneurs gaya nina  Gene Gutierrez, may-ari ng Big Ben’s Gourmet and  Big Ben’s Kitchen; Bianca Tolentino, may-ari ng Cofficina Café + Co-work; at Princess San Diego, founder ng What’s Your Flan.

Magkakaroon ng dialogue sa mga ahensiya ng pamahalaan kasama sina Atty. Sarah Lou Arriola, undersecretary ng Department of Foreign Affairs- Office of the Undersecretary for Migrant Workers Affairs (DFA- OUMWA); Atty. Hans Leo Cacdac, administrator ng Overseas Workers Welfare Administration (OWWA); Atty. Bernard Olalia, administrator ng Philippine Overseas Employment Agency (POEA); Atty. Emmeline Aglipay-Villar, undersecretary ng Department of Justice – Inter-Agency Council Against Trafficking (DOJ-IACAT) at Roel Martin, OIC Director, National Reintegration Center for OFWs (NRCO).

Para magpatala, bisitahin ang http://ofwsummit2019.villarsipag.org, o pumunta sa OFW and Family Summit Desk sa Vista Mall and Starmall branches sa buong kapuluan o mag-onsite registration 6:00 am sa araw ng summit.

Magsumite ng mga sumusunod na dokumento – kopya ng pasaporte ng  OFW, katibayan ng remittances, seaman’s book, job contract, kopya ng dokumento na patunay ng relasyon sa OFW gaya ng marriage certificate o birth certificate at valid ID.

Ang mga lalahok ay maaaring magkaroon ng pagkakataong manalo ng house and lot mula sa Lessandra ng Camella, 2 motorsiklo  mula sa Isuzu Cavite, Pangkabuhayan Showcase fmula All Day Supermarket, Appliance Showcase mula sa All Home, Xtreme Appliance at iba pang premyo.

Idaraos ang OFW and Family Summit sa taong ito sa pakikipag-partner sa DFA, DOJ-IACAT, DOLE, OWWA, POEA, Department of Science and Technology, Department of Social Welfare and Development, DTI, PhilHealth, Social Security System, PAGIBIG, Technical Education and Skills Development Authority, NRCO, Bureau of Fisheries and Aquatic Resources, Agricultural Training Institute, Philippine Carabao Center at Blas Ople Policy Center and Training Institute.

(NIÑO ACLAN/CYNTHIA MARTIN)