HATAW! D'yaryo ng Bayan hatawtabloid.com
Patay ang isang 17-anyos tricycle driver matapos pagbabarilin ng kanyang nakagitgitang driver ng kotse sa harap ng simbahan sa Brgy. Poblacion, sa bayan ng Pandi, sa lalawigan ng Bulacan nitong Martes ng gabi, 28 Oktubre.
Kinilala ang napaslang na si John Paul Bonifacio, 17 anyos, residente sa Bgy. Malibong Matanda sa naturang bayan.
Dead-on-the spot ang biktima na pinagbabaril sa loob ng ipinapasadang tricycle dahil sa tama ng bala sa kanyang katawan.
Ayon sa ilang nakasaksi, bago ang pangyayari ay nakagitgitan ng tricycle ng biktima ang isang kotse sa kalsada kaya nagalit ang driver nito.
Pagsapit sa harap ng simbahan ng Pandi, dito binaril ng hindi kilalang suspek ang biktima habang nakasakay sa kanyang tricycle.
Matapos ang pamamaril, tumakas ang suspek sa hindi malamang direksiyon.
Tinangkang sagipin ang buhay ng biktima nang dalhin sa pinakamalapit na pagamutan ngunit lagot na ang hininga.
Kasalukuyang nagsasagawa ng follow-up operation ang mga tauhan ng Pandi Municipal Police Station (MPS) upang matunton at madakip ang salarin sa krimen. (Micka Bautista)
