‘Notoryus,’ 1 pa todas sa enkuwentro sa Batangas

BATANGAS – Patay ang isang lalaking sinabing sangkot sa iba’t ibang kaso, sa enkuwentro sa mga pulis sa Talisay, Batangas, noong Lunes ng hapon.

Agad binawian ng buhay sa insidente si Jeffrey Escobido nang makipagbarilan sa mga pulis sa Brgy. Caloocan pasado 4:00 ng hapon.

Binawian din ng bu­hay sa insidente ang ba­baeng kasama ng suspek.

Iniimbestigahan ng pulisya kung may kaug­nayan ang babaeng bik­tima sa mga kaso ni Escobido.

Ayon kay S/Insp. Emil Mendoza, hepe ng Talisay police, maghahain ng arrest warrant ang mga pulis laban sa suspek nang manlaban si Escobido.

“Ipina-flag down siya, then according sa operating unit is parang maghahagis ng granada, and ‘yun nagkaroon na ng putukan,” ani Mendoza.

Dagdag ni Mendoza, sangkot si Escobido sa mga kasong carnapping, murder, frustrated murder, at iba pa sa Quezon at Nueva Ecija.

Narekober sa crime scene ang mga baril na posible umanong ginamit ng suspek.