HATAW! D'yaryo ng Bayan hatawtabloid.com
ANG saya-saya ni Kris Aquino kahapon habang patungo ng ABS-CBN para sa storycon cum contract signing sa Star Cinema para sa pelikulang gagawin niya kasama sina Joshua Garcia at Julia Barretto mula sa direksiyon ni Giselle Andres.
Habang biyahe ay naka-live feed si Kris sa kanyang social media accounts at ibinabalita niya na gustong-gustong sumama ni Bimby para siya mismo ang mag-interview sa kanya pero tinanggihan niya dahil baka kung ano-ano ang itanong.
Nabanggit pa ni Kris, “like son, like mother.”
Napuputol ang live feed ni Kris kaya hindi namin nasundan kaya nagkasya na lang kami sa mga post niya sa FB account na litrato kasama ang non-digital manager niyang si Erickson Raymundo, Star Cinema head Olivia Lamasan, VP for Star Music, Roxy Liquigan, at AdProm Head Mico del Rosario para sa contract signing.
Base sa pahayag ni Mico, walang leading man si Kris sa pelikula at kung tama ang huling dinig namin ay empleado niya ang JoshLia.
Baguhang director si direk Giselle pero matagal ng assistant director ni Inang Olive sa lahat ng pelikula niya at ang unang pelikulang idinirehe ay ang Loving In Tandem nina Maymay Entrata at Edward Barbers na ipinalabas noong 2017.
Matagal nang pangarap ni direk Giselle na makagawa ng romcom kaya noong binanggit sa kanya ang JoshLia ay talagang ang saya niya at kinabahan at natuwa noong malamang kasama si Kris.
Magsasama sina Kris at JoshLia sa pelikulang I Love You, Hater.
FACT SHEET
ni Reggee Bonoan
