Heart, pinag­kaguluhan ng mga paparazzi sa Paris

ANG saya-saya naman ng buhay ni Heart Evangelista! Buhay mayaman! Buhay donya!

Dahil bored na bored siguro siya sa maraming walang-kawawaang kaganapan dito sa Pilipinas, nagpasya siyang rumampa-rampa na lang muna sa Paris, France last week. Pasosyal-sosyal na pagsa-shopping na rin siguro.

Inireport ng Preview magazine online ilang araw lang ang nakararaan na na-monitor nila ang Instagram postings ni Heart [@iamhearte] na palakad-lakad  sa isang fashion street sa Paris na naka-pink overcoat. Kinunan si Heart ng litrato ng fashion photographers doon. Ang ilan sa mga litrato n’ya ay na-publish sa Paris magazines na gaya ng Coveteur at  InStyles.

Heart Evangelista Captures the Eyes of the Paparazzi in Paris ang titulo ng report sa Preview website. Ang subhead ng titulong ‘yon ay: Her bright pink coat is turning heads!

Heto naman ang maikli lang na text ng report: ”’Coveteur’ dubs the look worthy of a spot on their Best of Paris Fashion Week Street Style list;  meanwhile, ‘InStyle’ inc ludes it in a shop-the-trend story that crowns vivid pink as the season’s current favorite color. We agree!”

Ang caption naman na isinulat ni Heart mismo sa unang picture na ipinost niya ay: ”Starting our fashion rounds today. First@schiaparelli @sweet.escape.”

Ang picture ay ‘yun ngang naglalakad siya sa kalye na naka-pink ovecoat, pantalong maong, at sapatos na may takong na payat pero mataas. (“Stilletto” heels ang tawag sa sapatos na ‘yon.)

‘Di malinaw sa report kung kasama ni Heart o hindi sa biyahe n’ya sa Paris ang mister n’yang si Sen. Chiz Escudero. ‘Di rin nabanggit  sa report kung may kasama si Heart o wala sa pagpunta sa Paris.

Wala pang anak sina Heart at Sen. Escudero, kaya maraming panahon ang aktres sa pagpunta sa kung saan-saan—bukod pa sa marami nga siyang perang magagastos. Si Sen. Escudero ang may mga anak sa una n’yang misis at nasa poder nina Heart at Sen. Escudero ang mga bata.

KITANG-KITA KO
ni Danny Vibas