HATAW! D'yaryo ng Bayan hatawtabloid.com
BINIGYAN ng tig-US$100 bawat isang overseas Filipino workers (OFWs) na umuwi mula sa Abu Dhabi, United Arab Emirates.
Umabot sa 105 repatriated OFWs ang dumating sa Ninoy Aquino International Airport (NAIA) lulan ng Philippine Airlines kahapon na sinalubong sila ng mga opisyal ng Overseas Workers Welfare Administration (OWWA) at ng Department of Foreign Affairs (DFA).
Ayon kay Raul Dado ng Office for Migrant Workers Affairs ng DFA, ang mga Filipino ay pawang runaways na hindi nakatanggap ng suweldo mula sa kanilang mga employer.
Kabilang sa mga sumalubong sa mga migranteng manggagawa ay sina OWWA administrator Hans Cacdac at DFA Undersecretary Sarah Lou Arriola.
Laking tuwa ng mga OFW nang isa-isa silang binigyan ng US$100 ng mga opisyal ng pamahalaan.
Sinabi ni Dado na ang pera ay mula sa pondo ni Pangulong Rodrigo “Digong” Duterte upang bawat OFW ay may perang dala pag-uwi sa kani-kanilang pamilya.
Dagdag niya, karamihan sa OFWs ay biktima ng illegal recruiters. Sila ay pinangakuang makatatanggap ng malaking suweldo na naging dahilan para pumayag magtrabaho ang mga manggagawa sa abroad. (JSY)
