HATAW! D'yaryo ng Bayan hatawtabloid.com
ISINUGOD sa pagamutan ang isang Korean national makaraan magbaril sa sarili sa loob ng Manila Target Shooting Range sa HK Sun Plaza sa Pasay City, kahapon.
Kinilala ng pulisya ang biktimang si Seung Goo Shin, 49-anyos.
Sa pahayag ng empleyado ng naturang shooting range, na si Joe Bacli, nagbayad si Shin ng P3,000 para sa 60 rounds ng live ammunition.
Pagkaraan ay pumunta ang biktima sa Bay 6, at nagsimulang magpaputok.
Laking gulat ni Bacli nang makitang naka-handusay na ang biktima.
Agad isinugod si Shin sa Adventist Medical Center upang malapatan ng lunas.
Sa inisyal na imbestigasyon, nabatid na walang foul play sa insidente makaraan makuha sa lugar ang suicide note ng biktima.
Nakasaad sa suicide note ng biktima na nais niyang sunugin ang kanyang labi at itapon sa dagat.
Ipinaalam na sa Korean Embassy ang nasabing insidente.
(JAJA GARCIA)
