Ambulansiya ginamit sa pagtutulak ng shabu (Sa Norzagaray, Bulacan)

NASAKOTE ang isang hinihinalang tulak ng ilegal na droga at kanyang kasabwat sa isinagawang anti-drug operation ng pulisya sa Brgy. Pulong Sampalok, Doña Remedios Trinidad (DRT), Bulacan, kamakalawa.

Ayon kay S/Inspector Roldan Manulit, hepe ng Station Drug Enforcement Team (SDET) ng DRT police, kinilala ang isang suspek sa alyas na Ron, habang inaalam pa ang pagkakakilanlan ng kanyang kasabwat.

Sa ulat ng pulisya, dakong 9:00 pm kamakalawa nang madakip ang mga suspek habang sakay ng ambulansiya ng Brgy. Minuyan, Norzagaray, Bulacan.

Napag-alaman, nakatakdang mag-deliver ng shabu ang mga suspek sa kanilang kostumer sa Brgy. Pulong Sampaloc nang madakip ng mga awtoridad.

Nakompiska sa mga suspek ang apat sachet ng shabu, at P1,000 buy-bust money.

Kinompiska ng DRT police ang ambulansiya ng Brgy. Minuyan upang gamitin bilang ebidensiya sa pagsasampa ng kaso laban sa mga suspek.

(MICKA BAUTISTA)