12 sugatan sa 2 banggaan sa Maynila

UMABOT sa 12 katao ang sugatan sa dalawang insidente ng banggaan sa Maynila kahapon ng madaling-araw.

Ayon sa imbestigasyon ng Manila District Traffic Enforcement Unit, nagbanggaan ang pampasaherong jeep (PWR-873) na minamaneho ni Bievenido Tabale, at Mitsubishi Galant (DTG-480) na minamaneho ni Rafael Gonzaga, 52, dakong 1:40 am sa Kalaw Avenue at Taft Avenue, Ermita, Maynila.

Bukod sa dalawang driver, sugatan din sa insidente ang pitong pasahero ni Tabale na agad isinugod sa PGH.

Sugatan ang driver na si Renz Bagtas, ng SUV (TSI-965) at dalawa niyang kasama, nang bumangga sa isang delivery truck ng prutas na minamaneho ni Roger Bosotros dakong 1:00 am sa Remedios St. kanto ng Taft Avenue, Maynila.

(LEONARD BASILIO)