HATAW! D'yaryo ng Bayan hatawtabloid.com
ARESTADO ang isang second year college student makaraan ireklamo ng panggagahasa ng 14-anyos dalagitang out-of-school youth (OSY) na nakilala sa social networking site Facebook, sa Taguig City.
Nahaharap sa kasong rape in relation to Republic Act 7610 o Anti-Child Abuse Law, ang suspek na si Jayson Camacho, 19, estudyante ng Taguig City University, at residente sa M.L. Quezon St., Purok 2, New Lower Bicutan, Taguig City.
Si Camacho ay inaresto makaraan dumulog sa tanggapan ng Women and Children’s Protection Unit ng Manila Police District (MPD)-Station 7 (Abad Santos) ang biktima, kasama ang kanyang kuya na isang hair stylist sa David’s Salon branch sa Quezon City.
Batay sa reklamo, nagkakilala ang biktima at ang suspek sa Facebook noong Setyembre 2016 at makaraan ang dalawang buwan pagpapalitan ng mga mensahe ay naging magnobyo.
Nagkasundo ang dalawa na magkita nitong 7 Nobyembre sa isang convenience store sa Blumentritt sa Sta. Cruz, Maynila ngunit dinala ng suspek ang biktima sa Almeda St., sa Tondo at minolestiya.
Muling nagkita ang dalawa dakong 7:00 pm noong 14 Nobyembre at nagtalik sa madilim na bahagi ng riles, malapit sa flatform ng PNR sa Solis St., Tondo.
Hindi pa nasiyahan, dinala ng suspek ang biktima sa kanilang bahay sa Taguig City at doon ay muling sinipingan.
Dakong 1:00 pm noong 15 Nobyembre, nagpasama ang biktima sa kanyang kapatid sa presinto upang magreklamo na nagresulta sa pagkakadakip sa suspek. (LEONARD BASILIO, may kasamang ulat nina Maribeth Arines, Jam Breboneria, at Ruth Liman)
