Pulis narcotics utas sa selos

PATAY ang isang anti-narcotics operative ng Manila Police District makaraan barilin ng isang lalaki nitong Sabado sa Malate, Maynila.

Kinilala ang biktimang si PO1 Kirk Alwin Gonzales, miyembro ng Malate Police Station’s anti-illegal drugs unit.

Ayon sa ulat, paalis si Gonzales sa kanyang inuupahang apartment sa Balagtas St., nang barilin sa likod ng suspek na si Eli Mathan Sumampong, dakong 3 a.m.

“Umuwi lang ‘yung tao ko para kumuha ng gamit,” pahayag ni Senior Inspector Fernildo de Castro.

Napag-alaman, si Sumampong ay dating mister ng isa sa may-ari ng apartment. Sinasabing inakala ng suspek na ang biktima at ang dati niyang misis ay may relasyon.

“Lumalabas po sa imbestigasyon namin na itong si Eli Mathan na dating asawa ng isa sa part owner ng apartment ay naghihinala tungkol doon sa tao ko (Gonzales) na may relasyon pero wala naman,” pahayag ni De Castro.

( LEONARD BASILIO )