Leeg ng garbage collector sumabit sa kable, tigbak (Nahulog sa truck)

PATAY ang isang basurero makaraan mahulog mula sa isang garbage truck nang sumabit ang kanyang leeg sa isang nakalaylay na kable habang nakaupo sa ibabaw ng naturang sasakyan sa Sampaloc, Maynila kamakalawa.

Binawian ng buhay sa Jose Reyes Memorial Medical Center (JRMMC) ang biktimang si Jonel Cataylo, 25, ng Building 26, Unit 119, Permanent Housing, Balut, Tondo, Maynila.

Ayon sa ulat ni SPO4 Marco Saunar, nakatalaga sa Vehicular Traffic Investigation Section ng Manila Police District (MPD) – Manila District Traffic Enforcement Unit (MDTEU), dakong 2:40 am nang maganap ang insidente sa southbound lane ng Lacson Avenue sa Sampaloc, bago dumating sa Nagtahan flyover.

Sa salaysay ng saksing si Jovanie Ybanes, kasamahan sa trabaho ng biktima, nakasakay sila sa ibabaw ng isang Isuzu garbage compactor truck (ABJ-9136) ngunit pagsapit nila sa naturang lugar ay nagulat siya nang sumabit ang leeg ni Cataylo sa isang nakalaylay na kable, naging dahilan ng pagkahulog mula sa truck.

( LEONARD BASILIO, may kasamang ulat ni Joana Cruz )