Manhunt inilunsad vs truck driver (Umararo sa 3 estudyante)

NAGLUNSAD ng manhunt operation ang mga operatiba ng Manila Police District (MPD) laban sa driver ng truck na umararo sa tatlong college students habang naglalakad sa bangketa ng San Miguel, Maynila nitong nakaraang linggo.

Inilabas na ng pulisya ang larawan ng truck driver na si Jose Rafael Lubong, mabilis na tumakas makaraan ang insidente.

Ayon kay S/Insp. Arnold Sandoval, hepe ng Investigation Traffic Bureau ng MPD, si Lubong ay mahaharap sa kasong ‘abandoning person in danger’ at ‘reckless imprudence resulting in multiple physical injuries’ sa piskalya.

Magugunitang nitong Biyernes ng umaga ay inararo ng truck (WAP-148) na minamaneho ni Lubong ang mga estudyanteng sina Clarence Ray Ocampo, 2nd year engineering student ng Technological Institute of the Philippines (TUP), Nika Francisco at Daphne Lorenzo, kapwa estudyante ng National Teachers College (NTC), nagpapagaling na sa iba’t ibang pagamutan. ( LEONARD BASILIO, may kasamang ulat ni Kimbee Yabut )