Parking collector inutas sa tabi ng anak

MISMONG sa harap ng kanyang 12-anyos anak binaril at napatay ang isang 47-anyos parking collector sa Binondo, Maynilakahapon ng madaling-araw.

Kinilala ang biktimang si Zaldo Cualing, may asawa, ng 1136 Wagas St., Tondo, habang mabilis na tumakas ang hindi nakilalang suspek.

Base sa ulat na isinumite ni Det. Milbert Balinggan kay Senior Insp. Rommel Anicete, hepe ng Manila Police District-Crime Against Persons Investigation Section, bandang 2:00 am, naganap ang insidente sa Claro M. Recto Ave., at Juan Luna St., sakop ng Binondo sa Divisoria.

Ayon sa anak ng biktima na si Albert, 12-anyos, magkatabi sila ng kanyang ama nang biglang sumulpot ang suspek at pinagbabaril ang kanyang tatay.

Mabilis na isinugod ang biktima sa Justice Jose Abad Santos General Hospital ngunit hindi na umabot nang buhay.

Iniimbestigahan ng mga awtoridad kung may kinalaman sa pagiging parking collector ng biktima ang motibo sa pagpatay.

( LEONARD BASILIO, may kasamang ulat nina Kimberly Ann Yabut at Joana Cruz )