Spotter ng Ozamis-Colango robbery group timbog

ARESTADO sa mga tauhan ng Manila Police District (MPD) ang isang 41-anyos babaeng sinasabing nagsisilbing ‘spotter’ ng kinaanibang Ozamis-Colango robbery group, at top most wanted person ng pulisya, habang namimili sa isang malaking supermarket sa Quezon City kamakalawa ng gabi.

Ayon sa ulat ni Officer-in-Charge, Supt. Emerey Abating, ng MPD-Binondo Police Station 11, kinilala ang suspek na si Jocelyn Hernandez, alyas Nikki, naaresto dakong 1 p.m. sa isang supermarket sa North Edsa.

Sa ulat ng pulisya, ang suspek ay nagpapakilalang isang ‘spotter’ ng security agency at nakatalaga sa isang banko, ngunit sinasabing double-blade dahil ang layunin ng kanyang trabaho ay ‘spotter’ para sa pakay o tatargetin  na hoholdapin ng kanilang grupo.

Napag-alaman, matagal nang miyembro ng nasabing grupo ang suspek sa mga panghoholdap at pagpatay sa ilang mga biktima sa mga banko, jewelry stores at pawnshop sa Metro Manila, Luson, at Vizayas.