SOCE ng LP pinalawig ng COMELEC

PINALAWIG ng Commission on Elections (Comelec) hanggang Hunyo 30 ang pagsusumite ng Statement of Contributions and Expenditures (SOCE) ng mga kandidatong tumakbo sa nakaraang halalan.

Sa botong 4-3, pinagbigyan ng Comelec en banc ang hirit ng Liberal Party na ma-extend ang deadline nang pagsusumite ng SOCE.

Sa kabila ito ng rekomendasyon ni Campaign Finance Office commissioner-in-charge Christian Robert Lim, na hindi dapat pagbigyan ang kahilingan ng LP dahil hindi ito patas para sa ibang kandidato at partido na sumunod sa deadline.

Nabatid na nitong Martes lang nakapagsumite ng SOCE ang Liberal Party, anim araw makaraan ang orihinal na deadline na Hunyo 8.

Sa lahat ng mga kandidato sa pagka-pangulo, tanging si LP standard bearer Mar Roxas lang ang hindi pa nakapagsumite ng SOCE. Ayon sa kampo ni Roxas, bulto-bulto ang mga resibo na kailangan ma-scan at dapat ikabit sa mga dokumento kaya sila bigong makahabol sa deadline na itinakda ng Comelec.