15-anyos kaanak ni Digong utas sa saksak

PATAY ang isang 15-anyos binatilyo na sinasabing kamag-anak ni Incoming President Rodrigo Duterte sa Davao City.

Sumuko sa mga awtoridad ang mga suspek sa takot nang mabatid na isang Duterte ang kanilang napatay.

Kinilala ang biktima na si Daniel Duterte, residente sa Purok Interior Kilometer 5, Buhangin sa nabanggit na lungsod.

Ayon sa tiyahin ng biktima, wala silang alam na kaaway ng biktima at wala raw kinaanibang grupo.

Ang lolo ng biktima na si Gaudencio Duterte, katarungan ang hiling sa sinapit ng kanyang apong si Daniel.

Sinabi rin ng nakatatandang Duterte, malayong kamag-anak nila ang bagong pangulo na si Rodrigo Duterte.

Sumuko sa pulisya nitong Lunes ang dalawang suspek sa krimen na sina Gepsy Obar, 18; at Angelito Longay, 20-anyos.

Ayon kay Obar, sumuko siya dahil nalaman niyang isang Duterte ang kanilang napatay.

Lasing umano siya at nagkataong kasama ni Daniel si Joven Villacuer, ang pakay nila dahil may atraso sa kanila.

Naniniwala ang pulisya, personal na alitan ang ugat ng krimen at posibleng nadamay ang biktimang si Daniel sa away ng magkalabang grupo.

Sinasabing nasugatan din ngunit nakaligtas sa pananaksak si Villacuer.