60-anyos lola nag-enrol sa kinder (Sa GenSan)

GENERAL SANTOS CITY – Pinatutunayan na epektibo raw ang panawagan ng Department of Education (DepEd) nang pumasok sa unang araw ng klase ang 60-anyos lola sa kinder 2 sa New Society Central Elementary School.

Kinilala ang pinakamatandang mag-aaral na si Delia Tusan, residente ng Lanton, Apopong sa lungsod.

Nitong nakalipas na summer ay pumasok din sa special class si Tusan kaya ngayong pasukan ay nasa kinder 2 na siya kasama ang kanyang mga apo.

Sinabi niyang hindi pa huli ang lahat para mag-aral dahil mahirap sa isang tao na walang pinag-aralan.

Marunong na rin siyang bumasa, sumulat ng kanyang pangalan at aktibo sa recitation ngunit kailangan pang mahasa ang kanyang karunungan, ayon sa kanyang adviser na si Teacher Divine.

Una rito, sinabi ni Gloria Tolentino, principal ng nasabing paaralan, hindi hadlang ang edad para makapag-aral.

Bukod kay Tusan, isang 37-anyos ina ang kanyang naging kaklase.