Hired killer arestado sa Laguna

ARESTADO ng pulisya ang isang ex-convict na hinihinalang gun-for-hire, sa operasyon ng mga awtoridad nitong Linggo sa Sta. Maria, Laguna.

Kinilala ng mga pulis ang suspek na si Steve Requitud, residente ng Brgy. Inayapan sa nasabing bayan.

Ayon sa Philippine National Police’s Criminal Investigation Group (CIDG), ang suspek ay hinihinalang gun-for-hire.

Tinangka ng suspek na dumampot ng Magnum .357 handgun nang pasukin ng mga operatiba ng Police Regional Office 4A’s (Calabarzon) regional CIDG at Special Weapons and Tactics, ang kanyang bahay.

Nakompiska rin mula sa bahay suspek sa Brgy. Coralan ang isang M-14 sniper rifle, isang Bushmaster baby rifle, at dalawa pang handguns at ilang magazine na may mga bala.

Nakompiskahan din ang panganay na anak ng suspek na si Edward, ng isang .22 shotgun, isang AK-47, at ilang bala at shotgun shells.

Binigyang-diin ni Edward, nanalo bilang konsehal ng bayan sa nakaraang eleksiyon, ang nakompiskang mga armas sa kanilang bahay ay pawang lisensiyado

“May mga lisensiya itong lahat, registered. Kailangan kasi for self-defense dahil politiko kami,” aniya.

Ngunit sinabi ni Senior Supt. Joel Pernito, hepe ng regional CIDG unit, ang mga armas ay hindi rehistrado.

Dagdag ni Pernito, ang operasyon ay bahagi nang ipinatutupad ng pulisya na Oplan Paglalansag Omega laban sa lose firearms, at Oplan Salikop laban sa criminal gangs.