PNP low morale sa 3 heneral na sangkot sa illegal drug trade

CAGAYAN DE ORO CITY – Inamin ng pamunuan ng PNP Northern Mindanao, makapagdudulot din nang low morale ang ginawang controversial na expose’ ni President-elect Rodrigo Duterte na tatlong police generals ang sangkot sa illegal drug trade sa bansa.

Inihayag ni PNP regional spokesperson Supt. Surki Sereñas, umaasa silang hindi totoo ang banat ni Duterte sa tatlong hindi pinangalanang police generals.

Hindi rin naitago ni Sereñas ang pananaw na maaaring magdulot ng ‘demoralization’ sa kanilang tropa na nagsusumikap na labanan ang illegal drugs habang ilan sa top officials nila ay nag-e-enjoy ng mga pabor mula sa drug lords.

Sinabi ni Sereñas, bagama’t si Duterte ang nagbulgar nito, malinaw na wala pang factual charge na naihain sa ano mang korte.

Hinikayat ng opisyal ang lahat ng mga kasamahan na magpatuloy lamang sa kanilang mga trabaho para sa bayan.

Gayonman, all-out support aniya ang buong PNP Region-10 sa anti-drug campaign ng incoming president at katunayan patuloy ang kanilang “Oplan Linis Bahay.”

Sa nasabing “Oplan Linis Bahay,” 36 aniya sa kanilang kasamahan ang sinibak sa trabaho dahil nagpositibo sa drug test.

Pabor din siyang sampahan ng kaso ang sino mang sangkot na kanilang mga tauhan kapag mayroong matibay na ebidensiya.