Duterte iwas muna sa media interview

DAVAO CITY – Ayaw munang magpa-interview ni President-elect Rodrigo Dutete bilang sagot sa panawagang boykot sa kanyang press conference hangga’t hindi siya humihingi ng paumanhin kaugnay sa kanyang pahayag hinggil sa media killings, ayon sa kanyang spokesman kahapon.

“Unang-una, yun naman yung hiningi ng media,” pahayag ni Salvador Panelo.

Idinagdag niyang ang mga pahayag ni Duterte ay hindi lumalabas “as accurately as they should” sa media reports.

Tumanggi ang KBP na iboykot ang press conferences  ni Duterte.

Ayon kay Panelo, hindi pa niya masabi kung hanggang kailan iiwasan ni Duterte ang media interviews ngunit ang President-elect ay magiging “transparent” pa rin aniya sa kanyang mga aktibidad sa pamamagitan ng kanyang spokesman at iba pang appointees.

“Sa ngayon ‘yan ang kanyang patakaran,” aniya. “But then again, even assuming that to be, kahit na patagalan, wala pa rin namang kurtina na nakatakip o bintanang sinarado. Open pa rin e.”

Napikon si Duterte nang tanungin sa panayam nitong nakaraang linggo kaugnay sa panawagan ng international watchdog group na iboykot ng Filipino journalists ang press conference ng president-elect.

Nais ng Paris-based Reporters Sans Frontiers (RSF) na humingi ng paumanhin si Duterte sa pagsasabing marami sa mga journalist na napatay sa Filipinas ay mga bayaran at corrupt.

“Just because you’re a journalist, you are not exempted from assassination if you’re a son of a b****,” pahayag niya sa mga reporter nitong nakaraang linggo.