Wala bang itutumbang jueteng lord sa Duterte administration!?

‘YAN po ang tanungan na umuugong ngayon, matapos patayin ng riding-in-tandem si Alex Balcoba, isang reporter na nagkokober sa Manila Police District at mayroong puwesto ng Watch Repair sa Quiapo, Maynila.

Kalilibing pa lang ni Alex ay niratrat naman ang bahay ng isa pang tabloid reporter na si Gaynor Bonilla sa Makati City.

Pero bago pa ratratin ang bahay ni Bonilla, mainit nang pinag-uusapan sa iba’t ibang coffee shop at social media ang pahayag ni President-elect Rodrigo ‘Digong’ Duterte na kaya umano napapa-tay ang mga journalist ay dahil corrupt at bias.

Sabi nga ng National Union of Journalists of the Philippines (NUJP), ang pahayag ni Mayor Digong ay tila hudyat ng ‘open season’ sa media killings.

Hindi puwedeng ikaila na maraming corrupt sa hanay ng mga mamamahayag, pero hindi ito lisensiya para maging target ng hired killers at pagkatapos ay da-justify na ‘corrupt’ kasi.

At ang korupsiyon ay hindi lang namumunini sa hanay ng mga mamamahayag.

Marami sa gobyerno, sa military, sa pulisya, at sa iba pang ahensiya ng gobyerno.

‘Yang mga corrupt ba na ‘yan ay puwedeng itumba na lang basta?

E paano pa ‘yung mga jueteng lord at mga operator ng ilegal na sugal, sila ba ay puwede na rin itumba gaya ng mga drug lord?

Kung magiging batayan ng patayan ang pagiging tiwali ng mga opisyal sa gobyerno, mapaminsalang aktibidad ng mga ilegalista gaya ng drug lords, gambling lords, extortionists, smugglers at iba pang salot sa lipunan, tiyak araw-araw, maraming mapapaslang.

At tiyak na mamumunini ang negosyo ng punerarya at memorial park sa bansa.

Kung desidido ang gobyernong ito sa ganyang sistema, bakit hindi rin sampolan ang mga jueteng lords?!

‘Yang mga front ay STL pero sa jueteng pasok ang kobransa at hindi sa PCSO.

Wala kasi tayong naririnig, sino man sa mga bagong itinalaga ni Duterte na nagalit sila sa 1602 operators.

Huwag sanang mga mamamahayag ang pag-initan ninyo, unahin ninyo ang mga tunay na salot sa lipunan na baka hindi ninyo namamalayan ay unti-unti nang ‘pinapasok’ ang inyong hanay.

Matapang na pulis ni MDTEU Chief Supt. Olive Sagaysay dapat papurihan ni Erap!

Kung mayroong dapat parangalan na pulis si Yorme Erap, ‘yan ay walang iba kundi si SPO1 Yabut.

Isa kasi siyang pulis na magaling manindigan at hindi kayang sindakin ng reyna ng illegal terminal sa Lawton.

Mahigpit kasing ipinatutupad ni SPO1 Yabut ang utos ni Supt. Olive Sagaysay na huwag padaanin sa Quirino Highway ang mga bus mula sa probinsiya.

Isa kasi sa mga dahilan ng masikip na trapiko sa Taft Avenue ang mga bus mula sa southern Luzon.

Dapat kasi, hanggang doon lang sila Coastal Mall. Kaya nga mayroon nang mga garahe roon. Pero dahil gustong makauna sa mga pasahero kaya mayroong mga bus na gustong pumasok sa Maynila.

At ilan sila sa dahilan ng pagsisikip ng trapiko dahil wala naman silang legal na terminal sa Maynila.

Nagtatambakan sila sa illegal terminal sa Plaza Lawton kahit na ito’y para sa mga pedestrian. Kaya galit na galit ang tumbong ng reyna ng illegal terminal sa Plaza Lawton kay SPO1 Yabut.

Apektado kasi ang kolek-TONG kapag nababawasan ang mga bus na nakapapasok sa inaangkin niyang illegal terminal sa Plaza Lawton sa Maynila.

P300/P500 nga naman ang bayad kada bus sa kanyang illegal terminal. Kaya walang ibang ginagawa ngayon ang reyna ng illegal terminal sa Plaza Lawton kung hindi siraan at bakbakan sina SPO1 Yabut at Supt. Sagaysay kay Yorme Erap.

‘Yung pulis pa ang ipinamamaraling hindi siya kaya ni Erap? E sa totoo lang, ‘yang reyna ng illegal terminal sa Plaza Lawton ang madalas na gumagamit at sumisira sa pangalan ng Mayor ng Maynila.

As in, mahina raw ang P200,000 araw-araw na koleksiyon na ipinagyayabang nilang may kabahagi ang isang tanggapan diyan sa city hall.

Arayku!

Mayor Erap, pakisapok nga ‘yang operator ng illegal terminal sa Lawton dahil lagi kayong ginagamit na panangga sa kawalanghiyaan niya!

Para sa mga reaksiyon, suhestiyon, reklamo at sumbong, magtext sa 0926.899.91.27 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com