Robin Padilla magpapabitay kay Duterte kapag totoo (Dating bahay shabu lab)

NAPIKON ang aktor na si Robin Padilla sa pagkakadawit ng kanyang pangalan kaugnay sa big time drug bust operation na nagresulta sa pagkakakompiska sa mahigit P1 bilyong halaga ng liquid shabu.

Una rito, iniulat ng TV station GMA at online website ng pahayagang Inquirer, na dating pagmamay-ari ni Robin ang nasabing bahay na naging shabu laboratory sa isang residential property sa Angeles City, Pampanga.

Ibinenta raw ang naturang residential property ng tinaguriang bad boy ng Philippine showbiz sa isang abogado na si Atty. Pangilinan na siya ngayong nagpaparenta.

Sa pamamagitan ng kanyang Instagram account, hinamon ni Robin ang nabanggit na TV station at online website, sinabing kapag napatunayang totoo ang kanilang ulat ay mismong siya ang hihiling kay incoming president-elect Duterte na siya raw ang unang bitayin sa pag-upo bilang pangulo.

“Kapag napatunayan na totoo ang sinabi ng Inquirer at ng GMA news patungkol sa akin, hihilingin ko kay Mayor Duterte na ako ang unang bitayin niya sa kanyang pag-upo bilang Pangulo,” saad ni Padilla.