Lola kritikal sa taga ni lolo dahil sa selos

KORONADAL CITY – Nasa kritikal na kondisyon ang isang lola makaraan pagtatagain ng kanyang mister sa bayan ng Banga, South Cotabato dakong 10:30 p.m. kamakalawa.

Kinilala ang biktimang si Carmen Gonzales, 66, habang ang suspek ay si Abraham Gonzales, 73, kapwa residente sa Purok Daisy, Brgy. Malaya, Banga, South Cotabato.

Ayon kay Jomar Gonzales, apo ng mag-asawa, nagselos si Lolo Abraham kay Lola Carmen na pinagmulan ng pagtatalo ng dalawa hanggang humantong sa pagkuha ng patalim ng suspek at pinagtataga ang biktima.

Agad isinugod sa South Cotabato Provincial Hospital ang biktimang apat beses na tinaga ng suspek sa iba’t ibang bahagi ng katawan.

Samantala, agad naaresto si Lolo Abraham at nakakulong na ngayon sa lock-up cell ng Banga PNP.