P7-M cash, armas, shabu kompiskado sa bahay ng NCRPO cop (Sa Maynila)

NALANTAD sa mga ahente ng National Bureau of Investigation (NBI) ang tinatayang P7 milyong salapi, kilo-kilong shabu at sandamakmak na mahahaba at maiikling baril nang salakayin ang bahay ng isang pulis sa Balic-Balic, Sampaloc, Maynila kamakalawa.

Halos limang oras bago nabuksan ng mga awtoridad ang vault ni PO2 Jolly Aliangan, dating miyembro ng Manila Police District (MPD) at ngayon ay nakatalaga sa Anti-Illegal Drugs ng National Capital Region (NCR).

Kabilang din sa nadakip ang pinsan ni PO2 Aliangan na si Jeffrey Gutierrez at isa pang civilian agent ng NCRPO na hindi pa ibinunyag ang pangalan.

Dakong 5 a.m. nang salakayin ng mga ahente ng NBI ang bahay ni PO2 Aliangan sa Palawan St., Balic-Balic, Sampaloc makaraan makarating sa himpilan ng pulisya ang ulat na inire-recycle roon ang nakokompiskang shabu mula sa bigtime drug pushers.

Patuloy pang isinasailalim sa imbentaryo ang nakompiskang shabu at armas mula sa mga suspek.

Samantala, si PO2 Aliangan ay may kasong pangingikil ng $30,000 sa Manila Regional Trial Court, na inihain ng apat Koreano na hinuli ng kanilang grupo.