Gawad KWF sa Sanaysay, bukás na para sa mga lahok

Tumatanggap na muli ng mga lahok ang Komisyon sa Wikang Filipino para sa Gawad KWF sa Sanaysay na kaugnay sa pagdiriwang ng Buwan ng Wika na may temang Filipino: Wika ng Karunungan.

Hinihimok ang lahat ng magpadala ng mga orihinal na sanaysay na may pagtalakay sa larang ng agham-pangkalikasan, agham panlipunan, matematika, o kaugnay nito na nakasulat sa wikang Filipino. Kinakailangan din itong sumunod sa mga tuntunin ng KWF Manwal na Masinop na Pagsulat.

Tatanggap ang mga magwawagi ng sumusunod: PHP30,000.00 at titulong Mananaysay ng Taon para sa unang gantimpala, at magkahiwala na PHP20,000.00 at PHP15,000.00 para sa ikalawa at ikatlong gantimpala.

Maaaring ipadala ang lahok sa Gusaling Watson, Daang J.P. Laurel, San Miguel, Maynila.  Ang huling araw ng pagpapasa ay sa 8 Hulyo 2016, 5nh. Para sa karagdagang detalye, maaaring bumisita sa kwf.gov.ph, o tumawag sa 736-2519.