2,000 ecstasy tablets nakompiska sa ginang

NAKOMPISKA ang 2,000 tableta ng pink ecstasy mula sa isang ginang sa raid sa Pandacan, Maynila nitong Martes.

Ikinasa ng Philippine Drug Enforcement Agency (PDEA) ang operasyon makaraan makatanggap ng impormasyon ukol sa droga na nakasilid sa loob ng isang puzzle box.

Tinatayang nagkakahalaga ng P4 milyon hanggang P6 milyon ang nakompiskang droga.

Ayon kay PDEA Regional Director Edwin Ogario, lumalabas na nagmula sa Netherlands ang mga tableta.

Sinasabing nagpapataas ng enerhiya at nagpapadoble ng sexual arousal ang ecstasy. Hindi rin nakararamdam ng pagod, gutom at pagkauhaw ang mga gumagamit nito.

Samantala, iginiit nang nahuling ginang na nabiktima lang siya ng kaibigang si alyas “Dacky” na pinahiram niya ng ID.

Sa impormasyong natanggap ng PDEA, posibleng ginamit na courier ang ginang ngunit sasampahan pa rin siya ng kaso dahil sa paglabag sa Anti-Illegal Drugs Law.

Isasailalim sa pagsusuri ang nakompiskang ecstasy tablets.