Ginang ginilitan ng albularyo, dugo sinipsip

NAGA CITY – Kritikal ang kalagayan ng isang matandang babae makaraan gilitan ng albularyo sa iba’t ibang bahagi ng katawan at sinipsip ang kanyang dugo sa Brgy. Cuco, Pasacao, Camarines Sur.

Ayon sa anak ng biktima na si Arlene Francisco, araw ng Linggo nang dumating sa kanilang lugar ang albularyong si Eupoldo Traste, 65, para gamutin ang kanyang paralisadong ina na si Rosalina Rivera.

Sinabi ni Arlene, ang boyfriend ng kanyang bunsong kapatid ang nagdala sa nasabing manggagamot sa kanilang lugar, na galing pa sa lalawigan ng Bulacan.

Pagdating sa kanilang bahay, agad nilapitan ng albularyo ang matanda at sinimulang gilitan ang iba’t ibang bahagi ng katawan mula ulo hanggang paa, saka sinisipsip ang dugo sa loob ng dalawang araw hanggang maghina ang biktima.

Bunsod nito, tumawag ng pulis ang pamilya at ipinaaresto ang suspek habang isinugod sa pagamutan ang biktima.