3 nene niluray ng tiyuhin

SWAK sa kulungan ang isang 57-anyos diswasher makaraan halayin ang tatlong dalagitang magkakapatid na kanyang mga pamangkin sa Malabon City.

Nahaharap sa kasong statutory rape at dalawang bilang ng kasong acts of lasciviousness ang suspek na si Rogelio Dandan, residente ng Brgy. Longos ng nasabing lungsod.

Ayon kay Senior Insp. Rosility Avila, hepe ng Women and Children’s Protection Desk (WCPD) ng Malabon City Police, unang minolestiya ng suspek ang 11-anyos pamangkin na si Katrina noong Mayo ng nakaraang taon.

Sa pahayag ni Katrina kay PO2 Ma. Lea Balderama, dakong 6 a.m. natutulog siya sa loob ng kanilang bahay nang gapangin ng tiyuhin at hinalay. Pagkaraan ay tinakot na siya ay papatayin kapag nagsumbong kahit na kanino.

Habang nitong Abril, 2016, nagising ang kapatid ni Katrina na si Joan, 8-anyos, na hinihimas ng suspek ang maselang bahagi ng kanyang katawan.

Pagkatapos ay tinakot ng suspek ang pamangkin na huwag magsusumbong kahit kanino kung ayaw niyang may masamang mangyari sa kanya.

Dakong 3:45 a.m. kamakalawa, ginapang at pinaghihipuan din ng suspek ang pinakamatanda sa tatlo na si Sherly, 13-anyos at pagkatapos ay tinakot din na papatayin.

Ngunit hindi nagdalawang-isip na isinumbong ni Sherly sa kanilang ina ang ginawa ng suspek.

Bunsod nito, sinamahan ng ina ang anak sa himpilan ng pulisya na nagresulta sa pagkakaaresto sa suspek.

Gayonman, laking gulat ng ina nang ipagtapat ng dalawa pa niyang anak na babae na maging sila ay nilapastangan din ng tiyuhin.