Kelot ginising, niratrat tigbak

PATAY ang isang construction worker makaraan gisingin at pagbabarilin ng hindi nakilalang lalaki sa Malabon City kamakalawa ng gabi.

Agad binawian ng buhay sanhi ng mga tama ng bala ng kalibre .45 baril sa ulo ang biktimang si Elmer Gaspar, 28, ng Purok 6, Hernandez St., Brgy. Catmon.

Habang patuloy ang imbestigasyon ng mga awtoridad upang mabatid ang motibo sa krimen at pagkakilanlan ng suspek na mabilis na tumakas.

Sa imbestigasyon ni PO2 Benjamin Sy Jr., dakong 11 p.m. habang natutulog ang biktima kasama ang live-in partner na si Suzzete Angcon sa kanilang barong-barong nang may tumawag kay Gaspar sa labas.

Bumangon ang biktima upang alamin kung sino ang tumawag ngunit makalipas ang ilang sandali ay sunod-sunod na putok ng baril ang narinig ni Angcon.

Paglabas niya ay natagpuan niya ang biktimang nakahandusay na duguan at wala nang buhay.

Base sa salaysay sa pulisya ng nakababatang kapatid na babae ng biktima, dati nang nakulong si Gaspar dahil sa insidente ng pagholdap sa Navotas City.

Aniya pa, miyembro ang biktima ng grupo ni alyas Jake na bumaril at nakapatay sa kalabang grupo na “Bulabog” noong nakaraang taon.