7 sundalo sugatan sa grenade attack sa Jolo

ZAMBOANGA CITY – Sugatan ang pitong kasapi ng Army Scout Ranger makaraan pasabugan ng granada ang sinasakyan nilang military truck sa Marina St., Brgy. Walled City, Jolo sa lalawigan ng Sulu kahapon.

Kinilala ang mga sugatan na sina Sgt. Zandro Sambrano, S/Sgt. Ferdinand Bisnar, Cpl. Juanito Taguiam Jr., Cpl. Arth Manatad, Cpl. Arnel Pascual, Cpl. Louis Limmayog at Cpl. Calpasi Olli.

Ayon kay Major Filemon Tan, tagapagsalita ng Western Mindanao Command (WestMinCom), dakong 5:28 a.m. nang hagisan ng granada ang 6-by-6 truck sakay ang 10 sundalo ng 10th Scout Ranger Company (SRC) na nakabase sa Bud Datu, Brgy. Tagbak sa munisipyo ng Indanan.

Ayon kay Tan, pabalik na sana ang mga sundalo sa kanilang headquarter mula sa Jolo port makaraan sunduin ang kanilang mga kasamahan nang mangyari ang pagsabog.

Isinugod ang mga biktima sa Military Trauma Hospital ngunit inaasahang dadalhin sila sa Camp Navarro General Hospital sa loob ng WestMinCom sa Zamboanga City.

Sinabi ng opisyal, grupo ng bandidong Abu Sayyaf ang posibleng nasa likod nang pagsabog.

Patuloy ang pagtugis ng PNP at militar sa mga suspek na nakasakay sa isang motorsiklo na tumakas sa hindi pa matukoy na direksiyon.