Carlo J. Caparas ipinaaaresto ng CTA

IPINAAARESTO ng Court of Tax Appeals ang direktor na si Carlo J. Caparas kaugnay sa panibagong set ng tax evasion case na inihain laban sa kanya ng Department of Justice (DoJ) noong nakaraang buwan.

Nag-isyu ang CTA Second Division ng warrant of arrest sa tinaguriang national artist dahil sa paglabag sa National Internal Revenue Code (NIRC) bunsod ng kabiguang maihain ang kanyang taunang income tax return (ITR) para sa taon 2008 at 2009.

Pinagbabayad ang 57-year-old director ng P40,000 piyansa para sa kanyang pansamantalang kalayaan.

Batay sa imbestigasyon ng Tax Court, may nakita silang probable cause upang arestohin si Caparas.

Una rito ay sumasailalim na sa paglilitis si Caparas kaugnay sa hindi niya paghahain ng Value-Added Tax returns simula 2006 hanggang 2009.

Nasa mahigit P100 milyon ang hinahabol na buwis ng BIR sa batikang direktor.