Tapos na ngayon ang mga pangako… na sana’y ‘wag mapako!

BUKAS, opisyal nang nagwawakas ang kampanyahan.

Tapos na ang mga pangako, ang pambobola, ang yakap sa mga botante, pagbibigay ng giveaways at kung ano-ano pa ng mga kandidato.

Kung sino-sinong kandidato na rin ang nakapahiran ninyo ng pawis at nakatalsikang laway. Muntik na rin sigurong magkapalit-palit ang mukha ninyo dahil sa gitgitan at tulakan.

Nakipag-away para makamayan at makapagpa-selfie or groupie at s’yempre para magkaroon… ng espesyal na ‘souvenir’ na de-abot o de-ipit.

At tapos na rin ang bangayan sa social media ng kursunadang kandidato.

Anyway, tapos na nga ang lahat nang iyan pero mayroon pa tayong isang magdamag para muling repasohin ang listahan ng ating mga ibo-boto.

I-check rin po natin ang ating mga konsensiya kung tumpak nga ba ang pagpili natin sa mga politiko/kandidatong iboboto natin.

At pagkatapos ng botohan, manalo o matalo ang mga pinili nating kandidato ay mag-move on na rin agad tayo.

Pero alam n’yo naman ang Philippine election, ang natalo ay dinaya at ang nanalo ay nandaya.

Ooops tapos na rin nga pala ang maliligayang sandali ng mga ‘buwaya sa katihan’ este ng mga ‘PR’ cum ‘sulsultant’  na nagpipiyesta tuwing eleksiyon at nagtatakip ng puting kumot para magmukhang ‘malilinis’ sila.

‘E kahit naman ikula ang mga konsensiya ninyo hindi tatablan ng busilak na ‘sunshine.’

Sa mga nanalong ‘kandidato’ sa lahat ng elek-siyon, tuparin sana ang mga pangako ninyo sa mga tinatawag ninyong buraot.

‘Wag n’yong balasubasin ang mga buraot na pinangakuan ninyo…

Kawawa naman kasi ‘yang mga tinatawag ninyong buraot na umoorbit kung kani-kanino.

Pati nga kami na opisina ng diyaryo ay ma-dalas na naoorbitan ng mga tinatawag ninyong buraot.

Pero hindi namin sila itinataboy…

‘Yung mga ‘nagmamagaling’ at nagmamalinis tulungan ninyo ang mga buraot na malalapit sa inyo.

‘Yun lang.

Para sa mga reaksiyon, suhestiyon, reklamo at sumbong, magtext sa 0926.899.91.27 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com