Voter’s receipt alibi ng Comelec sa pagpapaliban ng eleksiyon?!

MULING pinagtibay ng Korte Suprema ang naunang desisyon na nag-aatas sa Commission on Elections (Comelec) na kailangan  nilang mag-imprenta ng voter’s receipt para sa eleksiyon sa Mayo 9.

Pinagtibay ito ng Comelec sa botong 12-0 (ang sinundan ay 14-0), ito’y makaraan ang oral argument kamakalawa ng umaga dahil sa inihaing motion for reconsideration ng Comelec.

Pero sa kabila nito, patuloy na nagpapahiging ang Comelec na magpapahaba ng voting hours ang pag-iisyu ng resibo at posible rin daw na hindi matuloy sa Mayo 9 ang eleksiyon, ayon naman sa isang Comelec commissioner.

‘E ano ba talaga, Chairman Andres Bautista?!

Nagkakaroon tuloy ng kaguluhan sa hanay ng mamamayan habang ang ibang political group ay nag-iisip na mayroong nilulutong senaryo ang administrasyon.

Kung hindi ‘firm’ sa kanilang mga desisyon ang Palasyo, dapat magpakita ng mahusay at matigas na pagdedesisyon ang Comelec.

Baka nalilimutan ni Chairman Bautista na siya ang may hawak ng ‘timon’ ngayon.

Sa kanya nakatuon ang mata ng buong bansa at hindi maaari ‘yang mga baka-baka at patawing-tawing na pagdedesisyon.

Kung magiging salawahan kasi sa pag-dedesisyon ang Comelec, madaling masasamantala ng mga grupong may masamang intensiyon sa nalalapit na eleksiyon ang tila ‘malambot na ilong’ ni Chairman Andres.

‘E ano ba talaga Chairman Andres, kaya ba ninyong mag-isyu ng resibo? Kaya ba ninyong gawin ang eleksiyon sa Mayo 9?!

Chairman, hindi lang naman paguwapohan ang eleksiyon, mas importante riyan na mayroon kang yagbols!

P35K KADA ULO SALYAHAN SA CIA

KABI-KABILA na rin daw ang palusutan ng overseas Filipino workers (OFWs) na kulang ang mga dokumento hindi lang sa NAIA kundi maging diyan sa CIA (CLARK INTERNATIONAL AIRPORT).

Kung sa NAIA ay 50K ang lagayan kada ulo, P35 mil kada ulo naman ang singilan at kalakaran ngayon diyan.

At ayon sa mga nakaaalam, walong libo raw ang ibinibigay sa ‘itaas’ at ‘yung natirang P27 mil ay pinaghahatian ng Head Supervisor, TCEU at pati na ang nagtatak na Immigration Officer!?

Ratsadahan na talaga!?

Palibhasa, ilang buwan na lang at palitan na naman!?

Ang tanong, sino naman ang sinasabi na para sa ‘itaas’ na may parteng P8 libo kada pasahero?

Sa 2nd floor o sa 3rd floor ba ‘yan ng BI main office???

I’m sure alam na alam ninyo kung sino ‘yan, CIA Head Supervisor Joedery David?!

Para sa mga reaksiyon, suhestiyon, reklamo at sumbong, magtext sa 0926.899.91.27 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com