HATAW! D'yaryo ng Bayan hatawtabloid.com
NITONG isang linggo, apat (4) na namang overseas Filipino workers (OFWs) bound for Middle East ang nasakote ng matitinong miyembro ng Travel Control Enforcement Unit (TCEU) sa airport.
Silang apat ay napag-alaman na puro walang Oversesas Employment Contract (OEC) na karaniwang hinahanap sa isang OFW bago lumabas ng bansa.
Sa kabila ng kakulangan sa kanilang mga dokumento, nagawa pa rin palusutin at tatakan ng isang IO Delas Malas ‘este’ Delas Alas pala ang kanilang pasaporte!
Nalaman ng inyong lingkod na nai-turn-over na sa IACAT ang lahat ng mga pasahero at ngayon ay kasalukuyang naghahanda ng kasong “human trafficking” laban sa nagtatak na Immigration Officer.
Paktay kang matanda ka!
Balita natin marami raw yatang asar kay I/O Delas Alat ‘este’ Delas Alas dahil kilala raw na mataray pagdating sa mga pasahero pati na sa mga kasamahang Immigrtaion Officer.
Kaya tuloy, imbes makisimpatiya sila sa inabot na salto nitong si Delas Malas ‘ay mali na naman’ Delas Alas ay welcome development daw ito para sa kanila?!
BI Commissioner Ronaldo Geron, tila po talamak na naman ang problema ng palusutan ngayon sa tatlong malalaking airport ng NAIA. Hindi po kaya oras na para kastigohin ninyo ang mga pasaway ninyong tauhan riyan bago pa marungisan ang inyong pangalan na matagal rin ninyong inalagaan?
