Wala akong dapat ihingi ng tawad — Bongbong

KASUNOD ng pagdiriwang ika-30 anibersaryo ng EDSA People Power ay muling nanindigan si vice presidential candidate Senador Ferdinand “Bongbong” Marcos na walang dapat ihingi ng tawad at ipaliwanag sa ipinatupad na batas militar ng kanyang ama.

Ayon kay Marcos, kailanman ay hindi siya maaaring sisihin ng sino man sapagkat ang kanyang ama na si dating Pangulong Ferdinand Marcos ay tunay na nagsilbi sa bayan at bansa.

Iginiit ni Marcos, bagamat siya ay anak ng dating Pangulo, hindi maituturing na pagbubuhat ng sariling bangko kung sasabihin niyang mayroong nagawa, naipatupad na proyekto at nagsilbi nang maayos at naglingkod nang tapat sa pamahalaan at bawat mamamayan ang dating presidente.

Naniniwala si Marcos na hindi siya maaaring matinag ng ano mang paninira laban sa pamamahala ng kanyang ama at pagiging isang Marcos.

Sinabi ni Marcos, ang mainit na pagsalubong sa kanya ng bawat mamamayan saan man siya pumunta sa iba’t ibang sulok ng bansa ay hindi lang patunay na mahal ng mamamayan ang kanyang ama, kundi patunay na talagang mayroon na silang pinatunayan pagdating sa pagsisilbi sa bayan o bansa at maging sa bawat mamamayan.

Aminado si Marcos na tuwing sasapit na ang halalan ay pilit ikinakabit sa kanilang pangalan ang hindi magagandang mga paratang at salita ngunit sa kabila nito ay hindi siya panghihinaan ng loob.