Barangay chairman sa Isabela itinumba (Tumanggi sa alok na pera)

CAUAYAN CITY, Isabela – Patay ang kapitan ng Brgy. Rumang-ay, Echague, Isabela, makaraan tambangan dakong 9 a.m. kahapon.

Ang biktima ay si Punong Barangay Nestor Medina, 51-anyos, may asawa at residente ng nasabing lugar.

Patungo sana ang biktima sa pulong ng Liga ng mga Barangay (LMB) sa bayan ng Echague nang siya ay tambangan at pinagbabaril.

Siya ay kilalang tagasuporta ng kasalukuyang alkalde ng Echague na si Mayor Melinda Kiat.

Inihayag ni Oblesa Medina Agustin, anak ng kapitan, nag-alok ng pera si LMB President Kiko Dy ngunit tinanggihan ng kanyang ama.

Si Kiko Dy ay anak ni Governor Bojie Dy ng Isabela at tumatakbong mayor sa bayan ng Echague, Isabela.

Sa kabilang dako, tumangging magbigay ng pahayag si LMB President Dy kaugnay sa pahayag ng anak ng biktima.