Buti pa ang airport taxi driver honest hindi katulad ng ibang opisyal diyan

ISANG airport taxi driver ang nag-turnover sa airport police ng isang blue pouch na may lamang US$ 1,600 cash at wallet na naiwan ng kanyang pasahero na sumakay sa Ninoy Aquino International Airport (NAIA) terminal 1 noong Sabado ng hapon (Pebrero 6, 2016).

Kinilala ang driver na si Anthony Masa, 37 years old, driver ng Jorivim Transport Services (fixed rates) isa sa mga transport concessionaire sa NAIA terminal 1.

Noong Sabado na iyon, isang lalaking overseas Filipino worker (OFW) mula sa Middle East ang sumakay sa kanyang taxi hanggang Coastal Mall sa Pasay City dakong 4 pm.

Matapos ibaba ni Masa ang OFW, sumakay naman ang mag-asawang dayuhan at nagpapahatid sa NAIA terminal 3.

Habang papunta sa NAIA 3, nagkaroon ng pagtatalo ang mag-asawa at nagpababa ang lalaki sa  Tramo at ang babae ay sa terminal 3.

Nang bumaba ang babae, napansin niya ang black tablet at blue pouch sa back seat kaya agad niyang tinawag ang babaeng dayuhan.

Pero ang tablet lang ang kinuha ng babae at sinabing, “the pouch is not ours.”

Agad ibinalik ni Masa sa NAIA terminal 1 at tinawag ang kanyang area manager para maging saksi sa pagsosoli niya ng pouch sa airport police.

Binuksan ng Airport police ang pouch at nakita ang laman na US$1,600 cash at wallet.

Nakita rin ang identification ng may-ari kaya agad nilang tinawagan.

Sa madaling salita, naisoli sa OFW ang kanyang pouch.

Buti pa ang Airport taxi driver at iba pang workers nagsosoli ng mga bagay na hindi sa kanila.

‘E ‘yung ibang opisyal diyan, hindi na nagsosoli, nambubulsa pa.

Nagpapanggap na masugid na tagasunod ng ‘Daang Matuwid’ pero milyon-milyon ang ibinubulsa.           

Hindi na nakapagtataka kung sa pagtatapos ng kanilang termino ay namumunini na sila sa pambubulsa.

Hintayin ninyo ang inyong karma!

Para sa mga reaksiyon, suhestiyon, reklamo at sumbong, magtext sa 0926.899.91.27 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com