Senado sinisi sa SSL 4 ‘deadlock’

NANINIWALA si House Majority Leader Neptali Gonzales, hindi napag-aralan ng Senado ang panukalang Salary Standardization Law (SSL) 4 na layuning itaas ang sahod ng mga manggagawa sa gobyerno sa loob ng apat na taon.

Pahayag ito ni Gonzales nang maganap ang ‘deadlock’ sa dalawang kapulungan ng Kongreso sa nasabing panukala habang papalapit ang pagsasara ng kanilang sesyon sa Biyernes.

Sinabi ni Gonzales, umaapela siya sa Senado na pag-isipan ang kapakanan ng mayorya, lalo ang kasalukuyang mga empleyado ng gobyerno bago ang pensiyon ng mga retiradong uniformed personnel.

Ayon kay Gonzales, maging ang Malacanang ay nagsabi ng hindi kakayanin ang pension indexation na ipinipilit ni Sen. Antonio Trillanes dahil ang pondo sa SSL na P57 bilyon ay naipasa na kasama sa 2016 national budget.

Hindi rin aniya maaari ang paninindigan ni Trillanes na ipasa na lang ang panukalang batas kasama ang indexation ng pensiyon ngunit gawing conditional o depende sa availability ng pondo.

Kaya kung magmamatigas aniya ang senador, maaaring maipit sila sa ‘deadlock’ o maipasa man ngunit tiyak i-veto rin ni Pangulong Aquino ang buong panukalang batas dahil hindi pwede rito ang line veto o isang probisyon lamang ang aalisin.

Kung hindi mapagtibay ang batas, ang nakalaang pondo para sa dagdag sahod ng government employees ay awtomatikong magiging savings at bahala na ang Ehekutibo kung saan ito ililipat.