3-anyos dedbol nang mabaril ng 5-anyos utol

ZAMBOANGA CITY – Nasa kustodiya na ngayon ng ‘children in conflict with the law center’ ng Department of Social Welfare and Development (SWD) ang 5-anyos paslit na aksidenteng nakapatay sa 3-anyos niyang kapatid sa loob ng kanilang bahay sa Purok Sunflower, Brgy. Longilog, sa bayan ng Titay, sa lalawigan ng Zamboanga Sibugay.

Batay sa impormasyon mula sa Police Regional Office (PRO-9), dakong 8 a.m. kamakalawa, masayang naglalaro si Renz Mark at ang bunso niyang kapatid na si Ralph Stephen habang abala ang kanilang ama na si Ramil Montiel sa paglilinis sa labas ng kanilang bahay.

Lingid sa kaalaman ng ama, pumasok pala ang dalawang bata sa kuwarto ng kanilang lolo na si Ronilo Montiel na noon ay natutulog at siyang nagmamay-ari ng kalibre .45 pistola.

Pilit na kinuha ng biktima ang baril na nakalagay sa itaas ng cabinet at iniabot sa kanyang nakatatandang kapatid.

Aksidenteng nahawakan ng bata ang gatilyo ng baril kaya pumutok ito papunta sa direksyon ng kanyang bunsong kapatid.

Itinakbo pa sa Sibud County Hospital ang biktima ngunit hindi na umabot nang buhay dahil sa grabeng tama ng bala sa kanyang dibdib.

Nasa kustodiya na ngayon ng pulisya ang lolo ng mga bata na posibleng maharap sa kaso dahil sa pagkamatay ng kanyang sariling apo.