2 paslit patay na natagpuan sa kotse (Sa Antipolo)

PINANINIWALAANG internal hemorrhage dahil sa bukol sa ulo ang ikinamatay ng dalawang paslit na kapwa 4-anyos na natagpuang patay sa loob ng isang Mitsubishi Lancer sa Antipolo City kamakalawa.

Sa ulat na tinanggap ni Senior Supt. Adriano Enong Jr., Rizal PNP Provincial Director, kinilala ang mga biktimang sina Renz Rajo y Alcoriza, at Aljo “Hanny” Malaco, kapwa nakatira sa Sitio Sta. Cruz, Brgy. Sta Cruz ng lungsod.

Base sa imbestigasyon ng pulisya, dakong 8 a.m. kamakalawa nang mawala ang dalawang bata at dakong 3 p.m. nang matagpuan ng mga magulang at ilang kapitbahay na nasa loob na ng nakaparadang Mitsubishi Lancer (UJC-118) sa lugar.

Si Rajo ay nakaupo sa driver seat na wala nang buhay, habang si Aljo Hanny ay agaw-buhay na isinugod ng ama sa Clinica Antipolo ngunit binawian din ng buhay.

Sa inisyal na imbestigasyon, pinaniniwalaang na-trap at na-suffocate ang magkaibigang paslit ngunit kuwento ni Janet Malaco, ina ng isa sa biktima, may malaking bukol sa ulo ang kanyang anak.

Ayon aniya sa doktor, posibleng namatay ang bata sa internal bleeding.

Nakita rin na ang kamay, paa at katawan ng mga bata ay nangingitim kaya’t pinaniniwalaang may naganap na foul play sa insidente.

Hinihintay pa ng pamilya ang resulta ng autopsy examination ng mga tauhan ng Scene of the Crime Operatives (SOCO) upang mabatid ang dahilan ng pagkamatay ng mga biktima.

Ed Moreno