Temperatura sa Tuguegarao bumagsak sa 18°C, Baguio 12°C

NAKARARANAS sa kasalukuyan nang napakalamig na panahon ang Lungsod ng Tuguegarao

Ayon kay Benny Esparehas ng Pagasa, naitala ang 18 degrees Celsius na temperatura sa lungsod kahapon ng umaga bunsod nang kalakasan ng hanging amihan.

Idinagdag niya na magtatagal ang malamig na panahon sa lungsod hanggang Huwebes.

Ang Tuguegarao City ay isa sa may pinakamainit na klima sa buong bansa at nakapagtatala rito ng pinakamataas na temperatura na umaabot sa 39 degrees Celsius tuwing summer season.

Samantala, lalo pang bumaba ang temperatura sa Lungsod ng Baguio at lalawigan ng Benguet.

Ito’y nang maitala ang pinakamalamig na temperatura kahapon ng umaga at ngayong buwan ng Enero sa City of Pines na aabot sa 12.2 degrees Celsius, mas mababa sa 14.6 degrees Celsius na naitala kamakalawa.

Ayon sa Pagasa, inaasahan ang pagbaba pa ng temperatura hanggang sa susunod na buwan ng Pebrero dahil pa rin sa epekto ng northeast monsoon.

Kaugnay nito, puspusan ang paghahanda ng mga magsasaka sa Benguet laban sa frost bite na idinudulot ng malamig na panahon.