P.2-M alok ng Malabon mayor vs killer ni Mañalac

NAG-ALOK ng P200,000 reward si Malabon City Mayor Len-Len Oreta sa sino mang makapagtuturo sa suspek na pumatay kay 2nd District Councilor Merlin “Tiger” Mañalac.

Ang nasabing konsehal ay namatay makaraang barilin ng hindi nakikilalang suspek na lulan ng motorsiklo sa harapan ng kanyang bahay kamakalawa.

Nagawa pang itakbo sa pagamutan ang biktima ngunit idineklarang dead on arrival.

Anak ng dating konsehal at pulis na si Colonel Boyong Mañalac ang pinatay na konsehal.

Samantala, inako ng Partisano (Armadong Operatiba ng Partido Marxista-Leninisita ng Pilipinas) ang nasabing pagpatay.

Nakasaad sa kanilang inilabas na kalatas sa pamamagitan ng kanilang lider na si Leni Katindig, na ang konsehal ay itinuturong nasa likod sa pagpatay sa kanilang kasamahan na si Ka Peter Villaseñor na miyembro ng New People’s Army (NPA) at kanilang ginawa ang pagpatay bilang parusa.