Minahan ni-raid 20 minero arestado (Sa Agusan del Sur)

BUTUAN CITY – Patuloy ang imbestigasyon ng pulisya sa bayan ng Sibagat, Agusan del Sur, upang matukoy ang mga personalidad na kakasuhan dahil sa illegal mining operations sa Sitio Agao, Purok 4, ng Brgy. Tabon-tabon sa nasabing bayan.

Ayon kay Senior Insp. Arthuro Gonato, chief of police ng Sibagat Municipal Police Station, 20 minero ang kanilang naaresto makaraan ang raid sa mining site kamakalawa.

Kasama sa hinuli ang may-ari ng mining operation na si Pastor Romelito Palantang.

Ayon kay Insp. Gonato, ipinasara na ang nasabing minahan nang malamang ilegal ang operasyon nito dahil permit to quarry lang ang kinuha para sa 20 ektaryang lapad ng operasyon imbes na anim ektarya lang.

Kasama sa gagamiting ebidensiya sa isasampang kaso laban sa mga suspek ang nakompiskang heavy equipments gaya ng walong backhoes, anim makinang nagsisilbing water pump at 20 water pumps na nagsasala upang makuha ang mga ginto.