Pangalan ni Poe nasa balota kung walang ruling sa Feb 1 (Ayon sa Comelec)

TIYAK na mapapasama sa balota ang pangalan ni Sen. Grace Poe sa oras na hindi makapaglabas ng desisyon ang Korte Suprema hanggang sa Pebrero 1, 2016 kaugnay nang nakabinbing disqualification cases sa hukuman.

Ayon kay Comelec Chairman Andres Bautista, isinasapinal na nila ngayon ang listahan ng mga kandidato na mapapasama sa paglimbag ng balota para sa eleksiyon sa Mayo.

Nakatakda na ang pag-imprinta ng election ballots sa Pebrero 1.

Habang ang Korte Suprema ay hindi pa tapos sa oral arguments kaugnay ng kaso ni Poe, at panig pa lamang ng senadora ang nakapaghain ng kanilang argumento.

Ipagpapatuloy ang oral arguments sa Enero 26 at hindi pa tiyak kung kailan makapagpapalabas ng desisyon ang Korte Suprema sa kaso ni Poe.