Bebot dedbol sa bundol, driver ng SUV kinuyog

DAGUPAN CITY – Agad binawian ng buhay ang isang babae makaraang banggain ng isang SUV habang naglalakad sa gilid ng kalsada sa Cabanatuan, Nueva Ecija kamakalawa.

Bali ang balakang ng biktimang si Ella Lopez na tumilapon pa ng ilang metro dahil sa lakas ng impact bago nabagok ang ulo nang tumama sa konkretong poste.

Nabigla ang mga kaibigan niyang kasamang naglalakad ng biktima.

Bago ang insidente, napansin nila na tatlong beses nagpabalik-balik ang SUV na tila may hinahanap hanggang tuluyang sinalpok ang nakatalikod na dalaga.

Tinangka pang tumakas ng driver ngunit hinabol ng mga residente sa lugar dahilan para bumangga ito sa isang tricycle bago inararo ang katabing gusali.

Dito na kinuyog ang suspek at agad dinala sa himpilan ng pulisya.

Hindi pa malinaw kung paano nabangga ng sasakyan ang biktima ngunit desidido ang pamilya ng babae na kasuhan ang nakabanggang driver.