Masbate tatambakan ng puwersa ng PNP at AFP (Sa eleksiyon)

LEGAZPI CITY – Ano mang araw mula ngayon, nakatakdang dumating ang aabot sa 150 miyembro ng Special Action Force (SAF) sa lalawigan ng Masbate.

Ito’y bilang paghahanda sa papalapit na eleksyon sa Mayo.

Ayon kay Chief Supt. Augusto Marquez Jr., pinuno ng Police Regional Office, nagkasundo na ang kanilang hanay at ang Armed Forces of the Philippines (AFP) para sa mga ide-deploy na tropa sa lugar na inaasahang magsisimula ngayong linggo hanggang sa matapos ang eleksiyon.

Aniya, ang SAF company, AFP at dagdag na mga tauhan ng PNP na ipadadala sa Masbate ay para mahigpit na mabantayan ang private armed groups na siyang nasa likod ng mga krimen sa lalawigan base na rin sa records sa nagdaang mga eleksyon.

Kung maaalala, hindi nawawala ang Masbate sa listahan na kabilang sa election hotspots o nasa areas of concern ng Commission on Elections.